A ampla convocatória de entidades sociais, políticas e sindicais, entre as que se encontra NÓS-Unidade Popular, que organizou a manifestaçom de hoje em Ferrol, conseguiu duplicar a assistência da realizada no mês de Dezembro.

Mais de 600 vizinhos e vizinhas marchamos polas principais ruas do centro de Ferrol contra o projecto de construçom de um macro-edifício numha praça histórica da cidade, que limitaria ainda mais os reduzidos espaços públicos em favor dos interesses das grandes construtoras.

Sete associaçons vicinais, várias culturais, sindicatos, partidos políticos, Federaçom de AMPAS e outras entidades sociais que já promoveram em Dezembro umha manifestaçom similar, conseguírom duplicar a participaçom. Somárom-se ainda, de maneira oportunista e à última hora, o BNG e o PSOE, cujas planas maiores municipais se situárom em primeira fileira à procura de protagonismo, poucos meses antes das Eleiçons de Maio.

Há que lembrar que essas formaçons da oposiçom institucional se recusárom à aderir à primeira mobilizaçom, mudando a sua posiçom em vista da boa resposta popular de umha iniciativa vicinal que exige aos governantes PP e a IF a eliminaçom do projecto de edifício comercial no centro da remodelada Porta Nova.

Pola nossa parte, NÓS-Unidade Popular apoiou e participou desde a primeira hora na dinámica mobilizadora como melhor opçom para parar os pés à direita espanhola, que em numerosos pontos do concelho de Ferrol tem previstos agressivos planos especuladores ao serviço das construtoras que financiam as suas campanhas eleitorais.

Nesse sentido, achamos muito positivo o grau de autoorganizaçom vicinal, à margem das forças políticas institucionais, as quais vem com receio os movimentos sociais que nom controlam. NÓS-UP reconhece o protagonismo das vizinhas e vizinhos, e adere a essa dinámica com toda a modéstia e respeito para umha iniciativa popular em que participamos e em cujos objectivos nos identificamos plenamente: defesa de um urbanismo ao serviço das pessoas e contra a especulaçom.

Como parte desse amplo movimento, exigimos a todas as forças institucionais representadas no pleno de Ferrol umha mudança na orientaçom da política urbanística, pois se bem o PP e IF som os máximos responsáveis pola mesma, os grandes traços estratégicos venhem já dos governos anteriores do PSOE e o BNG. O edifício da Porta Nova é um bom exemplo: NÓS-UP denunciou já em 2003 que foi o projecto aprovado por essas forças polítias o que possibilitou que o PP e IF incluíssem a construçom de um edifício na praça pública.

NÓS-UP quer igualmente insistir na necessidade de que a cidade de Ferrol recupere o nome histórico da Porta Nova, revogando o nome de “Praça de Espanha” que o franquismo impujo.

A dinámica mobilizadora deve continuar!

A praça é nossa, nom de ABECONSA!

Defendamos os espaços públicos!

Fora os especuladores do PP e IF!

Ferrol, 21 de Janeiro de 2007