Na tarde do passado dia 12 de Setembro, dous militantes de NÓS-Unidade Popular fôrom interceptados por dotaçons da Polícia municipal ferrolana, que dixérom responder a umha chamada que denunciava ter visto como alguém corrigia a toponímia de umha placa de estrada próxima de onde os nossos companheiros se encontravam nesse momento.

Um total de três carros e seis efectivos da Polícia municipal chegárom a concentrar-se no lugar, procedendo a identificar os dous vizinhos de Ferrol, e destacando as atitudes provocadoras de dous membros do corpo policial. Em meio de insultos e ameaças, o aparente responsável polo operativo garantiu aos dous detidos que seriam condenados porque os próprios polícias declarariam tê-los visto corrigir o sinal, apesar de tal circunstáncia ser falsa.

Porém, os abusos de autoridade nom ficárom por aí. O mesmo indivíduo afirmou que atribuiriam aos dous independentistas todas as correcçons ou pintadas existentes na zona, e poderiam incluso denunciá-los por passearem nas proximidades da calçada, por um passeio utilizado a diário por centenas de pessoas e que, segundo um dos polícias, “só tem funçom ornamental”.

NÓS-Unidade Popular quer denunciar a atitude de alguns membros da polícia municipal ferrolana, empenhados em assumir funçons repressivas e de perseguiçom política que nom lhes correspondem. Reclamamos igualmente que seja anulada qualquer actuaçom contra os nossos dous companheiros, e devolvido o material expropriado polos efectivos policiais de maneira arbitrária.

Assembleia Comarcal de NÓS-Unidade Popular em Trasancos

Ferrol, 13 de Setembro de 2007