A tentativa de três elementos da polícia municipal de Ferrol para provocar a condena de dous militantes de NÓS-Unidade Popular por galeguizaçom de sinais de tráfico fracassou nos tribunais da cidade. Os denunciantes e a testemunha (todos eles polícias) preferírom nom comparecer, e os companheiros fôrom absolvidos de um inexistente “desluzimento”.

Os dous militantes independentistas da comarca de Trasancos defendêrom na sua declaraçom perante o Tribunal a necessidade das correcçons toponímicas nas estradas do País, por ser umha prática histórica e legítima em defesa dos direitos lingüísticos da Galiza. Ao mesmo tempo, negárom a existência de qualquer desluzimento ou dificuldade na leitura do topónimo corrigido, “Valdovinho”, mostrando como prova umha fotografia do sinal em causa.

Ambos companheiros reconhecêrom igualmente a participaçom na acçom que permitiu a galeguizaçom do topónimo, apesar de nom terem sido eles os que apagárom umha letra e escrevêrom duas no seu lugar. Denunciárom igualmente os insultos e ameaças proferidas por dous polícias durante a identificaçom de que fôrom objecto, poucos minutos depois da acçom normalizadora.

NÓS-Unidade Popular considera este novo fracasso na via repressiva contra quem quer normalizar o uso social do nosso idioma umha pequena vitória no ainda longo caminho de recuperaçom plena do nosso direito à língua.