A esquerda independentista galega voltou a sair às ruas de Ferrol respondendo à convocatória da principal força sindical da comarca trasanquesa, a CIG, que se concentrou de manhá ao pé do monumento aos caídos em 1972 e se manifestou de tarde polas ruas do centro da cidade, com umhas 600 pessoas a reivindicar direitos laborais e protestar pola carestia da vida.

Nos últimos anos, as convocatórias da CIG em Ferrol estám a conseguir umha resposta maior do que noutras etapas, e essa tendência voltou a confirmar-se neste 10 de Março. Por volta das 600 pessoas marchárom polas ruas do centro coreando palavras de ordem reivindicativas, principalmente de temática sociolaboral, mas também republicanas, numha convocatória que coincidia com a visita oficial de Juan Carlos I a Ferrol.

Precisamente, fôrom a CIG, BRIGA e NÓS-Unidade Popular as únicas organizaçons que se posicionárom com clareza na nossa comarca frente à provocaçom da visita do monarca nomeado por Franco no mesmo dia em que os trabalhadores e as trabalhadoras lembramos a memória e o exemplo de Amador e Daniel, assassinados polas balas franquistas quando o actual monarca espanhol fazia parte da estrutura de poder da ditadura espanhola.

Daí que a nossa militáncia participasse, junto à juventude independentista e a outros sectores republicanos da esquerda, também na concentraçom anti-monárquica que juntou umhas 40 pessoas às portas dos estaleiros ferrolanos, quando a Família Real espanhola estava no interior. Apesar da censura mediática, a contestaçom estivo na rua, esclarecendo que existem sectores sociais republicanos nom só ‘filosóficos’, mas práticos e destemidos.

De resto, a nossa foi a única organizaçom política que, como noutros anos, se desmarcou do acto institucional convocado polo Governo municipal ferrolano à manhá na estátua que lembra a luita grevista de 1972, e os dous companheiros mortos por disparos da polícia franquista.