O novo governo da Junta da Galiza acaba de avalar a disparatada ideia promovida polo Consórcio de unir a cidade de Compostela com as instalaçons da Cidade da Cultura no monte Gaiás.

No inverno de 2008 o governo municipal tinha-se manifestado a favor desta obra, embora um informe contrário do Icomos, -umha entidade assesora da Unesco em questons de património, provocou a congelaçom de faraónico projecto.

A praça do Matadeiro e a futura estaçom do AVE som os dous pontos de conexom previstos para instalar os accesos desde Compostela ao Gaiás mediante duas linhas.

A Conselharia de Cultura com o apoio municipal tem previsto investir mais de 20 milhons de euros numha obra inecesária, injustificada, agressiva para o meio e contrária aos interesses da maioria do povo trabalhador compostelano. Umha obra que pode pôr em perigo a declaraçom da capital da Galiza como património da humanidade polo brutal impacto que este projecto terá para a zona histórica da nossa cidade.

Os orçamentos deste ano da Conselharia de Cultura já recolhem 9 milhons de euros para iniciar a primeira fase.

Para entendermos o enorme interesse que Sanches Bugalho e o Conselheiro de Cultura Roberto Varela manifestam nesta obra há que destacar que posteriormente a sua construçom com fundos públicos seria privatizado o serviço mediante umha concessom do transporte.

Esta iniciativa é continuaçom do despropósito chamado Cidade da Cultura que já consumiu mais de 500 milhons dos nossos euros, e que encetado a modo de mausoléu por Fraga Iribarne, posteriormente continuado irresponsavelmente pola Junta bipartida de PSOE e BNG, Feijó pretende culminar nesta legislatura.

A Cidade da Cultura, o Jacobeu, e agora o teleférico formam parte de um aberrante projecto integral que pretende converter Compostela num imenso parque de diversom mediante um nefasto modelo de turistificaçom que esta a devorar a identidade da nossa cidade, a qualidade de vida das vizinhas e vizinhos da capital galega e o meio natural desta Compostela cada vez mais enlatada e artificial.

Numha comarca e país com uns transportes públicos ainda precários e atrasados, em que os trens funcionam com combustível e nom oferecem serviços de proximidades a  “soluçom” é colocada na alta velocidade Madrid-Galiza e teleférico em Compostela. Que tipo de burla é esta?

Devemos exigir que se desista deste projecto e que no seu lugar se invista numha rede de transportes comarcal útil e respeitosa com o meio ambiente. Que se deixe de esbanjar o nosso dinheiro nessa Cidade da Cultura que ninguém precisa e que se invista em cultura real, popular e participativa. Nom queremos ver a nossa  cidade convertida numha Disneylándia de marisco e monumentos.

NÓS-UP apela ao conjunto das organizaçons culturais, sociais, sindicais e forças políticas comprometidas com a conservaçom do património popular de Compostela e contrárias a um modelo turístico irracional a unar esforços para deter esta aberraçom.