A 1 de Fevereiro, NÓS-Unidade Popular apresentou no registo da Cámara Municipal de Salvaterra a umha moçom denunciando o estado de muitas das estradas e ruas do nosso Concelho.

Reproduzimos a seguir o seu conteúdo:

NÓS-Unidade Popular Expom:

Assistimos com preocupaçom ao lamentável estado no que se encontram muitas das estradas do nosso Concelho. Boa parte das vizinhas e vizinhos de Salvaterra e também o transporte público, exponhem a diário os seus veículos a trajectos impraticáveis polo abandono das vias públicas.

As obras que se venhem executando com os fundos destinados polo PLAN E para Salvaterra, tenhem agravado em muitos casos o mal estado de estradas e ruas.

Para poder circular, é obrigatório ter pago previamente um imposto de circulaçom. É indignante que as estradas polas quais circulamos se achem em tam deteriorado estado.

O mal estado das vias públicas supom também um perigo para a segurança da vizinhança. Também os passeios som nalguns pontos insuficientes ou inexistentes.

Polo exposto anteriormente

Solicita:

Elaboraçom de um plano de trabalho para a execuçom urgente de melhoria de estradas por ordem de preferência em base ao grau de necessidade de cada umha e rematar com a política de gasto de fundos públicos em medidas para a galeria no lugar de para a populaçom.

Informaçom pública com os prazos para levar a cabo estas obras de melhoria.

Contactos com os outros Concelhos da Comarca para impulsionar umha rede de transporte público e eficaz que contribua para a reduçom do uso do transporte privado e facilite a mobilidade a quem no disponha de tal.

É necessário estabelecer umha rede de transportes que conecte os distintos núcleos de populaçom, quer dizer, paróquias entre si e com o "núcleo urbano" de Salvaterra, também com outros núcleos como Ponte-Areias, Porrinho, as Neves, Salzeda, Vigo, Portugal…

Todas e todos sabemos desta realidade pois a padecemos todolos dias. O governo de Salvaterra deve fazer todo o possível para involucrar à outras administraçons no arranjo desta situaçom.

Além do dito, é vergonhoso para Salvaterra e para a Galiza inteira que umha vila fronteiriça  mantenha as suas infra-estruturas em tam lamentável estado.

Exigimos à Cámara Municipal de Salvaterra de Minho que se ponha maos à obra com todos os meios a sua disposiçom para arranjar a situaçom na qual se acham nossas estradas e ruas.

Assembleia Comarcal de NÓS-Unidade Popular do Condado

Ponte Areias, 3 de Fevereiro de 2010