NÓS-UP de Trasancos, realizou na manhá de hoje, sexta-feira 26 de Dezembro, umha concentrarom diante dos julgados de Ferrol para mostrar a sua solidariedade com os dous filiados que estávam citados para emprestar declaraçom polos factos acontecidos o passado 7 de Dezembro em Sam Mateu (Narom) quando foi derrubada a estátua de Franco.

Às portas dos julgados foi despregada umha faixa com a legenda "Simbologia fascista fora da Galiza. Nom mais juízos a independentistas" polos militantes concentrad@s, que também portávam bandeiras da Pátria.

Os dous filiados encausados voltárom a solicitar perante o juíz a devoluçom do diverso material ilegalmente encautado pola polícia espanhola (bandeiras, colantes, umha camara digital...), e também denunciárom a montagem policial e a falsidade das provas apresentadas.
Todo fai presagiar um novo fracaso da polícia espanhola à hora de criminalizar à esquerda independentista. Segundo diversas fontes é praticamente seguro que se arquivem as diligências como já sucedeu anteriormente com a espectacular acçom de pintar de cor-de-rosa a estátua de Franco da Porta Nova em Outubro de 2000.

Após a concentraçom militantes da Unidade Popular denunciárom a acosa que padecérom por polícias à paisana.

NÓS-Unidade Popular ante a comparecência de dous dos seus filiados nos julgados de Ferrol em relaçom com a eliminaçom da estátua de Franco em Narom

A Direcçom Comarcal de NÓS-Unidade Popular na Terra de Trasancos quer fazer público o seu incondicional apoio aos dous companheiros citados para hoje, dia 26 de Dezembro de 2003, nos julgados de Ferrol, em relaçom com a eliminaçom da estátua de Franco em Narom no passado dia 7 de Dezembro.

Além de apoiarmos a acçom realizada por voluntári@s independentistas contra o anacrónico símbolo fascista na paróquia de Sam Mateu de Trasancos, queremos denunciar a manobra policial de incriminaçom de dous filiados da nossa organizaçom que nada tenhem a ver com a citada acçom. Lembremos que o acto contra a simbologia fascista foi realizado em plena manhá, observado pola vizinhança e por outras pessoas que aplaudírom umha iniciativa de carácter político e democrático em homenagem às centenas de pessoas que na nossa comarca fôrom assassinadas durante o golpe militar e a repressom desatada polos franquistas.

A polícia espanhola, empenhada em castigar o compromisso antifascista da esquerda independentista galega, buscou no dia 7 de Dezembro algumha vítima propiciatória que pagasse por umha acçom legítima e necessária, vista com simpatia por milhares de habitantes da comarca de Trasancos fartas da humilhaçom que supunha a permanência de um monumento ao franquismo na paróquia de Sam Mateu. Os dous companheiros, retidos quando se dirigiam ao acto público realizado no Val em memória das represaliadas e represaliados pola ditadura espanhola, fôrom acusados mediante falso testemunho por agentes da polícia espanhola, apesar de saberem que nada tinham a ver com a eliminaçom da estátua acontecida nessa manhá.

Reclamamos portanto o arquivo de qualquer diligência contra os nossos companheiros, ao tempo que denunciamos o papel repressor contra o independentismo galego que de maneira sistemática realizam as forças policiais espanholas presentes na comarca de Trasancos, com contínuos abusos de autoridade, pressons e provocaçons contra militantes e simpatizantes independentistas, assim como contra as suas famílias.

Nem a repressom policial nem a pressom judicial poderám deter o crescimento do movimento patriótico e de esquerdas representado polo independentismo galego agrupado em NÓS-Unidade Popular, tanto na nossa comarca como no conjunto da Galiza. Num Estado apodrecido pola corrupçom política e económica, polo avanço das posiçons mais reaccionárias e atentatórias contra as liberdades, a esquerda independentista constitui umha garantia de luita pola democratizaçom real e a soberania plena da naçom galega.

Ferrol, Trasancos, a 26 de Dezembro de 2003